सांगोला : सांगोला शहर व तालुका सोमवारी सकाळी ११:३० वाजता दुदुंब.. अशा मोठ्या गूढ आवाजाने पुन्हा हादरला. अचानक मोठा आवाज झाल्याने घरे हादरून संसारोपयोगी साहित्य खाली पडल्यामुळे नागरिक घाबरून रस्त्यावर आले. जो तो कशाचा मोठा आवाज झाला म्हणून एकमेकांकडे चौकशी करू लागले. या वेळी प्रशासनाने नेहमीप्रमाणे कानावर हात ठेवल्यामुळे नेमका आवाज कशाचा झाला याचा दिवसभरात अखेर उलगडा झालाच नाही.
सोमवारी सांगोला शहर व तालुक्यातील नागरिक आपापल्या कामात व्यस्त असताना सकाळी ११:२८ च्या सुमारास अचानक दुदुंब… असा मोठा गूढ आवाज झाल्याने एकच गोंधळ उडाला.जो तो एकमेकांना फोन करून अरे कशाचा मोठा आवाज झाला म्हणून चौकशी करू लागले. आवाजामुळे घरे हादरली, तावदाने फुटली तर आवाजाच्या व्याप्तीने सांगोला तालुक्यातील आजूबाजूचे तालुकेही हादरले.
