रक्ताच्या नात्यांपेक्षाही श्रेष्ठ मानल्या जाणाऱ्या मैत्रीच्या नात्याला बीडमध्ये कलंक लागला आहे. प्रियकरावर डोळा ठेवल्याने सख्ख्या मैत्रिणीनेच मैत्रिणीचा गळा दाबून खून केल्याची धक्कादायक घटना समोर आली आहे. या क्रूर प्रकारामुळे संपूर्ण जिल्हा हादरला आहे.
घटना अशी :
अंबिका चौक परिसरातील वृंदावनी फरताळे आणि होमगार्ड अयोध्या व्हरकडे या दोघी गेली तीन वर्षे मैत्रिणी होत्या. या काळात वृंदावनीच्या प्रियकराची ओळख अयोध्याशी झाली. ओळख हळूहळू प्रेमात बदलली. यावरून दोघींमध्ये वाद निर्माण झाला.
एका दिवशी अयोध्या वृंदावनीच्या घरी गेल्या आणि “माझ्या प्रियकराचा नाद सोड, आम्ही विवाह करणार आहोत” असं स्पष्ट सांगितलं. वाद वाढला आणि अयोध्याने विषारी औषध प्राशन केलं. ती तडफडत असताना संतापलेल्या वृंदावनीने तिचा गळा दाबून खून केला.
शोधमोहीम आणि धक्कादायक सत्य :
अयोध्याचा फोन तीन दिवस बंद असल्याने नातेवाईकांनी पोलिसांत तक्रार दिली. शिवाजीनगर पोलिसांनी चौकशी करून अवघ्या 24 तासांत सत्य बाहेर काढलं आणि वृंदावनीला अटक केली.
मृत होमगार्ड महिलेच्या नातेवाईकांनी या घटनेत आणखी कोणी सामील आहे का, याचा तपास करून अहवाल लवकरात लवकर सादर करण्याची मागणी केली आहे.
प्रेमाच्या त्रिकोणात फसलेलं आयुष्य…
एकीकडे ‘मैत्री’चं गाणं, दुसरीकडे ‘प्रेमाचा विश्वास’, आणि शेवटी ‘मृत्यू’ अशी या त्रिकोणी नात्याची शोकांतिका झाली. बीडमध्ये घडलेली ही घटना मैत्री आणि विश्वासाच्या नात्याला काळिमा फासणारी ठरली आहे.
