हैदराबाद : रायदुर्गम परिसरात २१ वर्षीय उदयोन्मुख तेलगू युट्यूबर तरुणीने आत्महत्या केल्याची धक्कादायक घटना उघडकीस आली आहे. कोमली (मूळ रा. विशाखापट्टणम) असे मृत तरुणीचे नाव असून ती हैदराबादमध्ये बीएससीचे शिक्षण घेत होती. शिक्षणासोबतच ती अर्धवेळ युट्यूबवर सक्रिय होती.
मिळालेल्या माहितीनुसार, कोमली मणिकोंडा येथील चित्रपुरी कॉलनीत काकांच्या घरी राहत होती. सोमवारी घरात कोणी नसताना तिने साडीच्या सहाय्याने गळफास घेतल्याचे पोलिसांनी सांगितले. प्रेमसंबंधातील तणावातून हा निर्णय घेतल्याचा प्राथमिक अंदाज व्यक्त केला जात आहे.
कोमलीचे विशाखापट्टणम येथील अखिल रेड्डी या सॉफ्टवेअर इंजिनिअर तरुणासोबत संबंध होते. गेल्या काही महिन्यांपासून दोघांमध्ये वाद होत असल्याची माहिती समोर आली आहे. काही महिन्यांपूर्वीही तिने आत्महत्येचा प्रयत्न केल्याची नोंद आहे.
घटनेची माहिती मिळताच रायदुर्गम पोलिसांनी घटनास्थळी धाव घेत पंचनामा केला असून गुन्हा दाखल करून पुढील तपास सुरू आहे. या घटनेमुळे सोशल मीडियावर हळहळ व्यक्त होत आहे.
जर तुम्ही किंवा तुमच्या ओळखीतील कोणी मानसिक तणावातून जात असेल, तर तात्काळ कुटुंबीय, मित्र किंवा तज्ञांची मदत घ्या. मदत मागणे ही कमजोरी नसून धैर्याची पायरी आहे.
टीप : बातमीतील व्यक्तीचा फोटो मूळ असून सादरीकरणासाठी AI तंत्रज्ञानाचा वापर करण्यात आला आहे.
