चेन्नई |
दाक्षिणात्य चित्रपटसृष्टीतील सुपरस्टार Thalapathy Vijay सध्या त्यांच्या चित्रपटांपेक्षा वैयक्तिक आयुष्यामुळे चर्चेच्या केंद्रस्थानी आले आहेत. तब्बल २७ वर्षांचा संसार ताणतणावाच्या वळणावर आल्याची चर्चा रंगली असतानाच, त्यांच्या पत्नी Sangeeta Sornalingam यांनी कथितरीत्या न्यायालयात घटस्फोटासाठी अर्ज दाखल केल्याचे वृत्त समोर आले आहे. या घडामोडींना आणखी एक वळण मिळाले ते म्हणजे मुलगा Jason Sanjay याने सोशल मीडियावर वडिलांना अनफॉलो केल्याची चर्चा.
गेल्या काही काळापासून विजय आणि संगीता वेगवेगळे राहत असल्याच्या बातम्या तमिळ चित्रपटसृष्टीत कानावर येत होत्या. मात्र, दोघांनीही याबाबत अधिकृत भूमिका स्पष्ट केलेली नाही.
अशातच जेसनने घेतलेल्या सोशल मीडिया निर्णयामुळे या चर्चांना अधिकच उधाण आले आहे. जेसन सहसा प्रकाशझोतात येणे टाळतो; त्यामुळे त्याचे हे पाऊल अनेकांच्या भुवया उंचावणारे ठरले आहे.
सूत्रांच्या माहितीनुसार, २४ फेब्रुवारी रोजी चेंगलपट्टू येथील कौटुंबिक न्यायालयात संगीता यांनी कायदेशीर विभक्त होण्यासाठी अर्ज दाखल केल्याचे सांगितले जाते. यामध्ये पतीचे कथित विवाहाबाहेरील संबंध, मानसिक त्रास, वैयक्तिक स्वातंत्र्यावर बंधने आणि आर्थिक बाबींवरील मर्यादा यांसारखे गंभीर आरोप नमूद केल्याची चर्चा आहे. संबंधित प्रकरण पुढील प्रक्रियेसाठी कुटुंब कल्याण समितीकडे वर्ग करण्यात आल्याचेही कळते. सुनावणी २० एप्रिल रोजी होण्याची शक्यता व्यक्त केली जात आहे.
दरम्यान, या सर्व आरोपांबाबत विजय किंवा संगीता यांच्याकडून अधिकृत दुजोरा मिळालेला नाही. त्यामुळे चाहत्यांमध्ये संभ्रमाचे वातावरण आहे.
१९९९ मध्ये प्रेमविवाह केलेल्या विजय-संगीता यांची प्रेमकहाणी एकेकाळी चाहत्यांसाठी प्रेरणादायी मानली जात होती. हिंदू आणि ख्रिश्चन परंपरेनुसार झालेल्या त्यांच्या विवाहसोहळ्याची त्या काळात मोठी चर्चा झाली होती. या दाम्पत्याला जेसन संजय आणि दिव्या साशा अशी दोन अपत्ये आहेत.
आता या नात्याला नेमके कोणते वळण मिळते, अधिकृत घोषणा कधी होते आणि न्यायालयीन प्रक्रियेचा काय निकाल लागतो, याकडे तमिळ चित्रपटसृष्टीसह चाहत्यांचे लक्ष लागले आहे. सध्या मात्र या कौटुंबिक वादावर दोन्ही बाजूंनी मौन पाळण्यात आले आहे.
