सतना (मध्य प्रदेश) : मध्य प्रदेशातील सतना जिल्ह्यातील जैतवारा परिसरात उघडकीस आलेल्या एका धक्कादायक खून प्रकरणाने परिसरात खळबळ उडाली आहे. अनैतिक संबंधांमुळे पती अडथळा ठरत असल्याच्या संशयातून पत्नीने आपल्या प्रियकराच्या मदतीने पतीचा खून केल्याचा आरोप असून पोलिसांनी दोघांनाही अटक केली आहे.
५ मार्च रोजी जैतवारा पोलीस ठाण्याच्या हद्दीत एका नदीच्या पुलाखाली एका तरुणाचा मृतदेह संशयास्पद अवस्थेत आढळून आला होता. या तरुणाची ओळख कौशलेंद्र प्रताप सिंह ऊर्फ डब्लू अशी पटली. मृताच्या डोक्यावर जड वस्तूने प्राणघातक वार केल्याच्या खुणा आढळल्याने हा खून असल्याचा संशय व्यक्त करण्यात आला. या घटनेनंतर मृताच्या भावाने पोलिसांत तक्रार दाखल केली होती.
तक्रारीची दखल घेत जैतवारा पोलीस ठाण्याचे प्रभारी अभिषेक कुमार पांडेय यांच्या मार्गदर्शनाखाली तपास पथकाने सखोल चौकशी सुरू केली. तपासादरम्यान पोलिसांनी तांत्रिक पुरावे, कॉल रेकॉर्ड्स आणि स्थानिक पातळीवरील माहितीची पडताळणी केली असता प्रकरणाचा धागा कौटुंबिक वाद आणि प्रेमसंबंधांकडे वळला.
पोलिस तपासात असे समोर आले की, मृताची पत्नी कुसुम सिंह ऊर्फ रीना सिंह आणि आरोपी संदीप पटेल यांची ओळख गुजरातमध्ये झाली होती. या ओळखीचे पुढे प्रेमसंबंधात रूपांतर झाले. काही काळानंतर कौशलेंद्रला या संबंधांची माहिती मिळाल्याने पती-पत्नीमध्ये वारंवार वाद होत होते.
पोलिसांच्या म्हणण्यानुसार, कौशलेंद्र त्यांच्या संबंधांना विरोध करत असल्याने तो त्यांच्या मार्गातील अडथळा ठरत होता. त्यामुळे पत्नी कुसुम आणि प्रियकर संदीप यांनी त्याला संपवण्याचा कट रचल्याचा आरोप आहे. ठरलेल्या योजनेनुसार संदीप पटेल याने कौशलेंद्रला एका निर्जन ठिकाणी बोलावून त्याच्या डोक्यावर दगडाने प्राणघातक वार केले. त्यानंतर गुन्हा लपवण्यासाठी मृतदेह फरफटत नेऊन नदीच्या पुलाखाली फेकून दिला.
तपासादरम्यान पोलिसांनी आरोपींचे कॉल रेकॉर्ड्स आणि इतर तांत्रिक पुरावे तपासले असता संपूर्ण कटाचा पर्दाफाश झाला. भक्कम पुराव्यांच्या आधारे पोलिसांनी पत्नी कुसुम सिंह आणि संदीप पटेल या दोघांनाही अटक केली असून त्यांनी प्राथमिक चौकशीत गुन्ह्याची कबुली दिल्याची माहिती पोलिसांनी दिली आहे.
या घटनेमुळे परिसरात खळबळ उडाली असून अनैतिक संबंधातून उभा राहिलेला वाद अखेर एका व्यक्तीच्या जीवावर बेतल्याने हळहळ व्यक्त होत आहे.
