बहादूरवाडी : दहावी परीक्षा 2026 च्या पार्श्वभूमीवर सांगली जिल्ह्यात कॉपीमुक्त अभियान अधिक प्रभावीपणे राबविण्यात येत असून, परीक्षा प्रक्रियेत पारदर्शकता व शिस्त राखण्यासाठी प्रशासनाने आधुनिक तंत्रज्ञानाचा प्रभावी वापर सुरू केला आहे.
या अभियानाची प्रभावी अंमलबजावणी जिल्हा परिषदेचे मुख्य कार्यकारी अधिकारी विशाल नरवाडे यांच्या मार्गदर्शनाखाली होत आहे. त्यांच्या नेतृत्वाखाली संपूर्ण शिक्षण यंत्रणा सज्ज झाली असून, प्रत्येक स्तरावर काटेकोर नियोजन केले जात आहे.
जिल्ह्यातील प्रत्येक ब्लॉक स्तरावर झूम मीटिंगचे नियोजन करण्यात आले आहे. या माध्यमातून केंद्रप्रमुख, पर्यवेक्षक व संबंधित अधिकाऱ्यांना थेट मार्गदर्शन दिले जात आहे. तसेच शिक्षणाधिकारी व संबंधित अधिकाऱ्यांशी थेट संवाद साधून परीक्षा केंद्रांवरील परिस्थितीचा आढावा तत्काळ घेतला जात आहे.
दरम्यान, परीक्षा केंद्रांवर CCTV कॅमेऱ्यांद्वारे सतत देखरेख ठेवण्यात येत असून, फ्लाइंग स्क्वॉडमार्फत अचानक तपासण्या केल्या जात आहेत. त्यामुळे कॉपीप्रकरणांना मोठ्या प्रमाणात आळा बसला असून, परीक्षा शांततेत व शिस्तबद्ध पद्धतीने पार पडत आहे.
बहादूरवाडी येथील परीक्षा केंद्रावर केंद्रप्रमुख बी. एल. गायकवाड व उपकेंद्र संचालक बी. एस. पाटील यांनी नियोजनबद्ध कामकाज पाहिले. तसेच दक्षता समितीचे ज्ञानेश्वर चांदणे व तंटामुक्त समितीचे अध्यक्ष पिंटू कारभारी (कोरेगाव) यांनी केंद्राला भेट देऊन पाहणी केली.
यावेळी आष्टा पोलीस ठाण्याचे अधिकारी व होमगार्ड यांनी उपस्थित राहून सुरक्षा व्यवस्था अधिक मजबूत केली. या सर्व उपाययोजनांमुळे जिल्ह्यातील परीक्षा व्यवस्थापन अधिक सक्षम झाले असून, विद्यार्थ्यांमध्ये प्रामाणिकपणे परीक्षा देण्याचे सकारात्मक वातावरण निर्माण झाले आहे.
