दक्षिणच्या ‘बाहुबल’ कलाकारांची हिंदी प्रेक्षकांमध्ये वाढली क्रेझ
दाक्षिणात्य कलाकारांच्या लोकप्रियतेचे आणि यशाचे कारण म्हणजे त्यांच्या चित्रपटांप्रती संपूर्ण समर्पणाची भावना. चित्रपटाच्या कथेसोबतच त्याची अभिनय क्षमता प्रेक्षकांना त्याच्याकडे आकर्षित करते. ज्याप्रमाणे प्रेमाला भाषा नसते, तसे सिनेमालाही भाषा नसते. चित्रपट चांगला बनवला गेला असेल तर प्रेक्षक आपोआप त्याकडे आकर्षित होतात. अलीकडच्या काळात दक्षिण भारतातील कलाकारांची लोकप्रियता उत्तर भारतात सातत्याने वाढत आहे. करण जोहरच्या ‘लायगर’ या चित्रपटाचा नायक विजय देवरकोंडा सध्या चांगलाच चर्चेत आहे. देवरकोंडाचा हा चित्रपट अजून रिलीज व्हायचा आहे. असे असूनही तो जिथे जातो तिथे हजारो लोक त्याला पाहण्यासाठी गर्दी करताना दिसत आहे. देवराकोंडाही त्याच्या लोकप्रियतेने थक्क झाला आहे. विजय सांगतो की तो त्याच्या दक्षिणेतील हिट चित्रपटांमुळे हिंदी प्रेक्षकांमध्ये लोकप्रिय आहे. हिंदी भाषिक प्रेक्षकांनी यूट्यूबवर त्याचे सिनेमे पाहिले आहेत आणि त्याच्या अभिनयाचे वेड लागले आहे.
‘लायगर’च्या भूमिकेसाठी तो खूप मेहनत घेत आहे.
त्याचा चित्रपट प्रेक्षकांना नक्कीच आवडेल याची त्याला खात्री आहे. ‘लायगर’ मधील त्याची व्यक्तिरेखा अतिशय आक्रमक आहे. विजयप्रमाणेच ‘पुष्पा’ फेम अल्लू अर्जुन आणि ‘बाहुबली’ फेम प्रभास देखील हिंदी चित्रपटात येण्यापूर्वीच प्रेक्षकांमध्ये लोकप्रिय झाले होते. प्रेक्षकांनी प्रभास आणि अल्लू अर्जुनला डोक्यावर घेतले.1981 मध्ये ज्यावेळेला दाक्षिणात्य अभिनेता कमल हसनने ‘एक दुजे के लिए’ या चित्रपटातून हिंदी चित्रपटांमध्ये पदार्पण केले होते, तेव्हाही त्यांना प्रेक्षकांनी डोक्यावर घेतले होते. तसेच प्रेक्षकांमध्ये साऊथचे अभिनेते रजनीकांत, अरविंद स्वामी आणि आर माधवन यांचीही क्रेझ होती. रजनीकांत यांच्या ‘रोबोट’ चित्रपटाने तर सर्वच स्तरावर धुमाकूळ घातला होता. ‘बाहुबली’, ‘केजीएफ’, ‘पुष्पा’, ‘आरआरआर’ यांसारख्या दक्षिणच्या अनेक सुपरहिट चित्रपटांनी यशाचे झेंडे गाडले आहेत. ‘बाहुबली 2’ ने 1949 कोटी रुपयांचा विक्रमी व्यवसाय केला आहे.
त्यापाठोपाठ ‘केजीएफ 2’ ने 1228 कोटी आणि ‘आरआरआर’ ने 1131 कोटी रुपयांचा बिझनेस केला आहे. या सगळ्यांच्या सर्वात पुढे एकट्या अमिरखानचा ‘दंगल’ चित्रपट आहे. याने 1968 कोटी रुपयांचा गल्ला जमवला आहे. शाहरुख खान, सलमान खान, अक्षय कुमार किंवा अजय देवगण यांनाही जे जमलं नाही ते दाक्षिणात्य कलाकारांनी केलं आहे. या यशानंतर दाक्षिणात्य कलाकारांचा बॉलिवूड चित्रपटांमध्ये काम करण्याकडे कल वाढला आहे. आता दक्षिणचा अकील एनैनी, मामूट्टी अभिनेत्री साक्षी वैद्यसोबत ‘एजंट’ चित्रपटात काम करताना दिसणार आहे. या चित्रपटात अॅनी ‘रॉ एजंट’च्या भूमिकेत अॅक्शन करताना दिसणार आहे. दक्षिण अभिनेता एनैनी ‘दसरा’ या चित्रपटाद्वारे बॉलिवूडमध्ये पदार्पण करणार आहे, ज्यात त्याच्यासोबत राष्ट्रीय पुरस्कार विजेती कीर्ती सूरज दिसणार आहेत. हा चित्रपट 2023 मध्ये रिलीज होणार आहे.
दक्षिणेतील रवी तेजादेखील ‘टायगर नागेश्वरा राव’ या चित्रपटातून हिंदी चित्रपटात प्रवेश करणार आहे. या चित्रपटाची कथा ‘टायगर नागेश्वर राव’ नावाच्या खतरनाक दरोडेखोराच्या व्यक्तिरेखेवर आधारित आहे. आणखी एका ‘हनुमान’ चित्रपटातसुद्धा तेजा मुख्य भूमिकेत दिसणार आहे. दक्षिणेतील आणखी एक दिग्गज बालम कोंडा श्रीनिवास ‘छत्रपती’च्या रिमेकद्वारे बॉलिवूडमध्ये प्रवेश करणार आहे. दक्षिण प्रेक्षकांचा लाडका अभिनेता थलपथी विजय ‘थलपथी 67’ मधून प्रेक्षकांच्या भेटीला येणार आहे.
![Rate Card](http://sankettimes.com/wp-content/uploads/2023/08/Sanket_SANKET_MAI_20230729_3_1_.jpeg)
याच चित्रपटात समंथा पोलीस इन्स्पेक्टरच्या भूमिकेत पाहायला मिळणार आहे. ‘प्रोजेक्ट के’ हा एक विज्ञान चित्रपट प्रेक्षकांच्या भेटीला येणार असून जो भविष्यातील जगाविषयी माहिती देतो. यामध्ये प्रभास, अमिताभ बच्चन आणि दीपिका पदुकोणसोबत असणार आहेत. याशिवाय प्रभास ‘आदि पुरुष’ या चित्रपटातही दिसणार आहे. अल्लू अर्जुनच्या ‘पुष्पा’ चित्रपटाच्या प्रचंड लोकप्रियतेनंतर आता ‘पुष्पा पार्ट 2’ देखील लवकरच चित्रपटगृहांमध्ये प्रदर्शित होणार आहे. यामध्ये अल्लू अर्जुनच्या अॅक्शनचा थरार प्रेक्षकांना अनुभवता येणार आहे. ‘आरआरआर’ फेम ज्युनियर एनटीआर ‘एनटीआर 30’ या अॅक्शन ड्रामा चित्रपटात दिसणार आहे. राम चरण ‘आरसी 15’ चित्रपटात दिसणार आहे. या चित्रपटात त्याची अभिनेत्री कियारा अडवाणी असणार आहे.
एकीकडे बॉलीवूड कलाकार फ्लॉप होता असताना दक्षिण कलाकार मात्र उत्तर भारत पट्ट्यात यशाचे शिखर गाठताना दिसत आहेत. या प्रेक्षकांना त्यांच्या चित्रपटांची आतुरता लागली आहे. हे चित्रपट नक्कीच यशाचा झेंडा गाडतील, अशी चर्चा आहे. गेल्या आठवड्यात अमिरखानचा ‘लाल सिंह चड्ढा’ प्रदर्शित झाला होता, मात्र हा चित्रपट आठवड्याभरात केवळ 50 कोटींची कमाई करू शकला आहे. 160 कोटींच्या या चित्रपटाला तब्बल 100 कोटींचा फटका बसण्याची शक्यता आहे. ‘अक्षय कुमारचा ‘रक्षाबंधन’देखील तिकीट बारीवर फारसा कमाल करू शकला नाही. आठवड्याभरात 40 कोटींचा बिझनेस या चित्रपटाने केला आहे.
हा कसा तरी आपला खर्च काढू शकेल असे म्हटले जात आहे. अमिरखानचा ‘लाल सिंह चड्ढा’ चांगला चित्रपट असल्याचे बोलले जात आहे, मात्र सोशल मीडियावरील बहिष्कारामुळे या चित्रपटाला फटका बसला असल्याचे बोलले जात आहे. याचे कारण काहीही असले तरी बॉलिवूड कलाकारांना यापुढे दर्जा असलेले चित्रपटच प्रेक्षकांसमोर आणावे लागणार आहेत. कोरोना काळानंतर बॉलीवूड आधीच कालांवडला आहे. त्यात दाक्षिणात्य कलाकारांचा बॉलिवूडमध्ये शिरकाव झाल्याने प्रेक्षकांना दर्जेदार चित्रपट पाहायला मिळत आहेत. दक्षिण चित्रपटांच्या रिमेकवर जगणाऱ्या बॉलिवूडला आता पर्याय मिळाला आहे. दक्षिण कलाकारांनीच बॉलिवूडवर स्वारी केल्याने हिंदीतील दिग्गज कलाकारांसमोर आव्हान उभे राहिले आहे.
-मच्छिंद्र ऐनापुरे, जत जि. सांगली