ऑनलाईन वस्तू घरपोच मागवताना……!

 सध्याचे युग हे ऑनलाईन युग आहे असे म्हटले जाते. कारण आज सर्वकाही ऑनलाईन खरेदी करता येते आणि ऑनलाईन विकताही येते. आज प्रत्येकाच्या हातात स्मार्ट फोन आहे या फोनमध्ये वस्तूंची ऑनलाईन विक्री करणारे किमान ४-५ अँप्स तरी नक्कीच आहेत. पाण्याच्या बाटलीपासून सोन्याच्या दागिन्यांपर्यंत सर्वच वस्तू, खाद्यपदार्थ ऑनलाईन पद्धतीने आणि तेही सवलतीच्या दरात घरपोच मागवता येतात. हल्ली तर ताज्या भाज्या आणि ताजी फळेही ऑनलाईन मिळू लागली आहेत, त्यातही तुम्हाला ती सेंद्रिय पद्धतीने पिकवलेली हवी असतील, तर तशी सुविधाही उपलब्ध आहे.

शहरासारख्या ठिकाणी  लोकांकडे पैसे जास्त आणि वेळ कमी असल्याने बाजारात जाऊन वस्तूंची निवड करणे आणि त्यांची खरेदी करण्यासाठी गर्दीतून वाट काढत जाणे, दुकानदाराशी भावतोल करणे वेळकाढूपणाचे वाटू लागले आहे. कधीतरी विरंगुळा म्हणून विंडो शॉपिंग ठीक आहे, मात्र गरजेच्या वस्तू मागवण्यासाठी हल्ली ऑनलाईन संकेतस्थळांनाच प्रथम पसंती मिळू लागली आहे. अर्थात आजही ऑनलाईन शॉपिंग करणारा एक विशिष्ट्य वर्ग असून त्याची संख्या दिवसागणिक कमालीची वाढू लागली आहे. त्यातही ऑनलाईन खरेदी व्यवहारात फसवणूक झाली नसेल तर ऑनलाईन खरेदीवरील विश्वास अधिक दृढ होऊन अधीकाधीक वस्तू ऑनलाईन मागवण्याकडेच अशांचा कल असतो. रोजच्या घरच्या जेवणाचा कंटाळा आला असेल, तर हॉटेलमधील लज्जतदार जेवण घरी ताटापर्यंत आणून देणारी स्विगी-झोमॅटो सारखी संकेतस्थळे दिवसातील २४ तासांपैकी झोपेचे ७-८ तास वगळता उरलेला वेळ आपल्या सेवेसाठी तत्पर असतात.

किराणा माल, इलेक्टॉनिक वस्तू, घरातील भांडी-कुंडी, फर्निचर, औषधे, पुस्तके, शोभेच्या वस्तू, भेटवस्तू, सर्व प्रकारचे कपडे, बेडशीट, सौंदर्य प्रसाधने, पूजेचे साहित्य सर्व काही ऑनलाईन उपलब्ध करून देणारी असंख्य संकेतस्थळे आज कार्यरत असून त्यामध्ये नवनवीन संकेतस्थळांची भरच पडत आहे. सणांच्या निमित्ताने केली जाणारी खरेदीही हल्ली ऑनलाईन पद्धतीनेच होऊ लागली आहे. वाढती ग्राहक संख्या लक्षात घेता या संकेतस्थळांमध्ये आपसांत कमालीची स्पर्धा सुरु असते. त्यासाठी प्रत्येक संकेतस्थळांकडून विविध ऑफर्स आणि सवलती दिल्या जातात. १५ मिनिटे ते २४ तासांत डिलिव्हरी देण्याचे आश्वासन दिले जाते. पूर्वी केवळ सणांच्या निमित्ताने दिल्या जाणाऱ्या विशेष सवलती महिन्यातील मोजके दिवस सोडल्यास वर्षभर चालूच असतात. ‘विंटर सेल’, ‘समर सेल’, ‘हाऊसफुल सेल’, ‘धमाका ऑफर’ यांसारख्या वेगवेगळ्या गोंडस नावांनी ग्राहकांना आकर्षित करण्याची स्पर्धा या संकेतस्थळांवर बाराही महिने सुरु असली, तरी त्यामधून लाभ हा ग्राहकाचाच होतो ही एक जमेची बाजू आहे. या ऑनलाईन कंपन्या थेट उत्पादक कंपन्यांकडून उत्पादने घेत असल्याने त्यांना ती अत्यंत अल्प दरात मिळतात त्यामुळे ग्राहकांना ती आपला लाभ वजा करून स्वस्त दरात देणे त्यांनाही परवडते. या सर्वांचा परिणाम परंपरागत व्यवसाय करणाऱ्यांवर होऊ लागला आहे, हे जरी सत्य असले तरी ऑनलाईन खरेदीत लोकांचे ४ पैसे वाचत असल्याने त्यांचा अधिक कल त्याकडेच असतो.