जत,संकेत टाइम्स : जत शहरात सातत्याने धोकादायक ठरत असलेल्या विजापूर – गुहागर मार्गावरील सोलनकर चौकात भरधाव मालवाहतूक कंटेनरने दुचाकीवरून चाललेल्या तिघांना चिरडले आहे. यात एक तरुण जागीच ठार झाला. दोघे जण गंभीर जखमी झाले.
सतीश (पप्पू) आप्पासाहेब माळी (वय २१, रा.छत्रीबाग रोड, जत) असे मृत तरुणाचे नाव आहे.तर मायाप्पा शिवाजी बर्वे (वय ३२) व सागर बाळू धाईगडे (वय २१, दोघेही रा. जवळा, ता सांगोला) हे गंभीर जखमी झाले.त्यांच्यावर मिरज येथील शासकीय रुग्णालयात उपचार सुरू आहेत.याप्रकरणी जत पोलीसात गुन्हा दाखल झाला आहे.
पोलिसांनी दिलेली माहिती अशी, शुक्रवारी रात्री साडेदहा वाजण्याच्या सुमारास सांगोला-जत राष्ट्रीय महामार्गावरून भरधाव येणाऱ्या मालवाहतूक कंटेनरने सतीश माळी यांच्या मोटरसायकलला धडक दिली. यावेळी सतीश व त्याचे मित्र हे जत शहरातून शेगावकडे जाणाऱ्या राष्ट्रीय महामार्गावरून चालले होते.मोटारसायकलीवरील सतीश हे कंटेनरच्या मागील चाकाखाली सापडल्याने त्यांचा जागीच मृत्यू झाले.
तर अन्य जखमी मायाप्पा बर्वे व सागर धाईगडे हे गंभीर जखमी झाल्याने त्यांना जत येथील ग्रामीण रुग्णालयात दाखल केले आहे.घटनेनंतर कंटेनर चालक फरार झाला असून जत पोलीस अधिक करत आहेत.
