अँपवर मिळवा झटपट दाखला; आहे का ‌तुमच्याकडे महा ई-ग्राम ! | ३३ प्रकारचे मिळतात दाखले ग्रामपंचायतीत जायचे कशाला?

जत : ग्रामपंचायतीमार्फत दिली जाणारी प्रमाणपत्रे मोबाइलवरून घरबसल्या काढता येत आहेत. यासाठी महा-ई-ग्राम सिटिझन अँप विकसित करण्यात आले आहे.या अँपवर जिल्ह्यातील १४९२ ग्रामपंचायतींची नोंद झाली आहे. तर अँपवरून ३३ प्रकारचे दाखले मिळत असल्याने लोकांना वारंवार हेलपाटे मारण्याची गरजच राहिलेली नाही.यासाठी महा-ई-ग्राम सिटिझन कनेक्ट अँप डाउनलोड करून नागरिकांना सेवा घेता येणार आहे.सरकारी कार्यालयांमध्ये मारावे लागणारे हेलपाटे आणि त्यामुळे होत असलेला मनस्ताप या सुविधेमुळे वाचण्यास मदत होणार आहे.जन्म-मृत्यू प्रमाणपत्र, विवाह नोंदणी दाखला, दारिद्रयरेषेखालील प्रमाणपत्र, असेसमेंट उतारा असे ३३ प्रकारचे दाखले महा-ई-ग्राम सिटिझन अँपवरून नागरिकांना मिळतात. तसेच या अँपवरून संबंधित ग्रामस्थाला त्याच्याकडील मिळकतींना लागणारा कर व भरलेल्या कराची स्थिती घरबसल्या पाहता येते.