जत कायम राखण्याचे काँग्रेसपुढे आव्हान | भूमीपुत्र की पार्सल भाजपाअंतर्गत वाद ; कोन मिळवणार तिकिट? 

जत : लोकसभा निवडणुकीनंतर होत असलेल्या विधानसभा निवडणुकीमध्ये राज्यातील सर्वात शेवटचा आणि जिल्ह्यात सर्वाधिक विस्तारलेल्या जतमध्ये यावेळी नवीन राजकीय समिकरणे उदयास येण्याची चिन्हे दिसत आहेत. पाणी प्रश्‍नामुळे कायम चर्चेत राहिलेला हा मतदार संघ सध्या काँग्रेसकडे असला तरी गतवेळचा पराभव धुऊन पुन्हा भाजपकडे खेचण्याचे जिकीरीचे प्रयत्न यावेळी सुरू आहेत. भाजपचे विधानपरिषदेचे आमदार गोपीचंद पडळकर यांनी अलिकडच्या काळात जतमध्ये जास्त लक्ष केंद्रित केल्याने भूमीपुत्र की पार्सल असा वाद येथे भाजपअंतर्गतच पाहण्यास मिळत आहे. तरूण नेतृत्व तमणगोंडा रविपाटील यांनी पडळकर यांना निवडणुकीपुर्वीच जनकल्याण संवाद यात्रेच्या माध्यमातून पक्षांतर्गतच आव्हान दिले आहे. भाजप अंतर्गत उमेदवारीसाठीचा संघर्ष दिसत असला तरी काँग्रेसचे विद्यमान आमदार विक्रम सावंत यांच्यापुढेही कसोटीचा काळ सध्या दिसत आहे.