कोल्हापूर : कोल्हापूरमध्ये पुन्हा एकदा बंदी असलेल्या व्हेल माशाची उलटी म्हणजे अंबरग्रीस अवैधरित्या विक्रीसाठी घेऊन जाणाऱ्यांना ५ जणांना कोल्हापूर पोलिसांनी ताब्यात घेतले आहे.कोल्हापूर जिल्ह्यातील आंबोली आजरा मार्गावर संशयितांना पकडून त्यांच्याकडून तब्बल १० कोटी ७४ लाख १० हजार किंमतीची व्हेल माशाची उलटी जप्त केली आहे.
कोल्हापूर पोलिसांची आजपर्यतची सर्वात मोठी कारवाई आहे.सातत्याने व्हेल माशाच्या उलटीच्या तस्करी करणाऱ्यांच्या कोल्हापूर पोलिसांनी उलटी जप्त करत संशयितांना अटक केलेली आहे.आज पुन्हा व्हेल माशाची उलटी विक्रीसाठी घेवून जात असताना कारवाई केली आहे.
कुडाळ येथून व्हेल माशाची तस्करी करण्यात येणार असल्याची गुप्त माहिती आजरा पोलिसांना मिळाली होती. त्यानुसार, आजरा पोलिसांनी सकाळपासूनच अंबोली आजरा मार्गावर सहाय्यक पोलीस निरीक्षक सुनील हारुगडे यांच्या मार्गदर्शनाखाली सापळा लावून बसले होते.
दरम्यान, या मार्गावरून सदर संशयित आरोपी जात असताना पोलिसांच्या निदर्शनास आले आणि गाडीची तपासणी केली असता त्यात व्हेल माशाची उलटी मिळून आली.कोल्हापुरातील गवसे तालुका आजरा येथे आजरा पोलिसांनी १० कोटी ७४ लाख १० हजार रुपये किमतीचे व्हेल माशाची उलटी जप्त केली आहे. याप्रकरणी कुडाळच्या ५ संशयितांना पोलीसांनी अटक केली आहे.व्हेल माशाच्या उलटीचे वजन १० किलो ६८८ ग्रॅम इतके आहे.
या कारवाईने जिल्ह्यात एकच खळबळ उडाली आहे. तर या प्रकरणी कुडाळच्या ५ जणांना ताब्यात घेण्यात पोलिसांना यश आलं आहे. याप्रकरणी आता आजरा पोलीस ठाण्यात गुन्हा दाखल करण्यात आला असून पुढील तपास सुरू आहे.
