विधानसभा निवडणुकीसाठी २० नोव्हेंबरला मतदान होणार असून, मतदार यादीत नाव असणाऱ्यांसाठी निवडणूक आयोगाने मतदार छायाचित्र ओळखपत्र व्यतिरिक्त इतर १२ प्रकारची ओळखपत्रे ग्राह्य धरली जाणार असल्याचे स्पष्ट केलेले आहे. त्यामुळे मतदान कार्ड जवळ नसल्यास काळजीचे कारण नाही. १२ प्रकारच्या ओळखपत्रांपैकी कोणताही एक पुरावा दाखविल्यानंतर मतदान करता येणार आहे.
प्रशासनाकडून आवश्यक तयारी पूर्ण विधानसभा निवडणुकीसाठी प्रशासनाकडून तयारी झाली आहे. मतदानाची टक्केवारी वाढीसाठी मतदानासाठी ओळखपत्र लागते. यासाठी छायाचित्रासह मतदार ओळखपत्र आहे. असे मतदार ओळख पटविण्यासाठी आपले मतदार ओळखपत्र सादर करतील. तरीही जे नागरिक मतदार ओळखपत्र सादर करू शकणार नाहीत, असे नागरिक ओळख पटविण्यासाठी अन्य १२ पैकी कोणताही एक पुरावा सादर करु शकतील. त्यामुळे त्यांनाही मतदान करता येणार आहे.
पत्त्यात बदल केला तरी ओळखपत्र ग्राह्य मतदार यादीतील पत्त्यात बदल केला असेल; पण, त्यांना नवे ओळखपत्र मिळाले नसेल तर आधीचे ओळखपत्र ग्राह्य धरले जाईल. मात्र, त्या व्यक्त्तीचे नाव विद्यमान पत्त्यासह मतदार यादीत आवश्यक आहे. नोंदणीकृत मतदारांना किमान पाच दिवस आधी मतदान केंद्र, यादी भाग क्रमांक, मतदानाची तारीख, वेळ आदी माहितीच्या चिठ्ठयांचे निवडणूक कार्यालयाकडून वितरण केले जाईल. छायाचित्र ओळखपत्रासोबत घेऊन याये, असे आवाहनही करण्यात आलेले आहे.
ओळखीसाठी हे पुरावे ग्राह्य…
आधार कार्ड, मनरेगा अंतर्गत निर्गमित रोजगार ओळखपत्र, बँक किंवा टपाल विभागातर्फे छायाचित्रासह वितरित पासबुक, कामगार मंत्रालयाद्वारे वितरित आरोग्य विमा स्मार्ट कार्ड, वाहनचालक परवाना, पॅन कार्ड, राष्ट्रीय लोकसंख्या नोंदवही अंतर्गत भारतीय महानिबंधक आणि जनगणना आयुक्तांनी जारी केलेले स्मार्ट कार्ड, पासपोर्ट, निवृत्तीवेतनाचा दस्तावेज, केंद्र अथवा राज्य शासन, तसेच सार्वजनिक क्षेत्रातील उपक्रम, पब्लिक लिमिटेड कंपन्यांनी आपल्या कर्मचाऱ्यांना वितरित केलेले छायाचित्र ओळखपत्र, संसद, विधानसभा, विधान परिषदेच्या सदस्यांना वितरित अधिकृत ओळखपत्र. केंद्र सरकारच्या सामाजिक न्याय व सशक्तीकरण मंत्रालयाच्या वतीने दिव्यांग व्यक्तींना वितरित विशेष ओळखपत्र हे १२ पुरावे ग्राह्य धरले जाणार आहेत. अनिवासी भारतीयांना त्यांची ओळख पटविण्यासाठी त्यांचा मूळ पासपोर्ट आवश्यक असणार आहे.
