कोल्हापूर जिल्ह्यातील दहा जागांसाठी झालेल्या आजच्या मतमोजणीत महायुतीने तसेच जनसुराज्य पक्षाने बाजी मारत कोल्हापूर जिल्ह्यात असलेले काँग्रेसचे अस्तित्व संपवून पूर्ण सुपडा साफ केला आहे. या निवडणुकीत शिवसेना शिंदे गटाच्या ३ भाजप २ जनस्वराज्यशक्ती पक्षात दोन जागा मिळाल्या आहेत. निवडणुकीचा निकाल समजताच कार्यकत्यांनी गुलालाच्या उधळणीत आतषबाजी करत जल्लोषी मिरवणूक काढली.
यावेळी कार्यकत्यांचा उत्साह ओसंडून वाहत होता. कोल्हापूर जिल्ह्यामध्ये महाविकास आघाडीचा पुरता धुव्वा उडाला असून महायुतीने जोरदार बाजी मारली आहे. कोल्हापूर जिल्ह्यामध्ये दहा पैकी नऊ जागांवर महाविकास आघाडीला झटका बसला. सर्व जागांवर महायुतीचे उमेदवार आघाडीवर होते. फक्त चंदगड विधानसभा मतदारसंघांमध्ये बंडखोर उमेदवार शिवाजी पाटील आघाडीवर आहेत.
मात्र, ते सुद्धा भाजप बंडखोर उमेदवार असल्याने जिल्ह्यातून महाविकास आघाडी हद्दपार झाली आहे. दरम्यान, कोल्हापूर दक्षिणमध्ये सतेज पाटील यांना सर्वात मोठा तगड़ा झटका बसला असून पुतणे ऋतुराज पाटील यांचा दारुण पराभव झाला आहे. भाजपचे अमल महाडिक यांनी पुन्हा एकदा आमदारकी खेचून आणली आहे. त्यामुळे जिल्ह्यातील पहिला निकाल कोल्हापूर दक्षिण सतेज पाटील यांनी जागावाटपामध्ये बाजी मारत पाच जागा खेचून आणल्या होत्या. मात्र, त्या सर्वच्या सर्व जागा अडचणीत आल्याने मोठा झटका बसला. खासदार धनंजय महाडिक यांना महाविकास आघाडीकडून मोठ्या प्रमाणामध्ये टार्गेट करण्यात आलं होतं.
त्यामुळे त्याचा फटका अमल महाडिक यांना विधानसभा निवडणुकीमध्ये बसणार का? याची चर्चा रंगली होती. मात्र, कोल्हापूर दक्षिणमध्ये त्याचा कोणताही परिणाम झाला नसल्याचे निकालातून स्पष्ट झालं आहे. अमल महाडिक यांनी पुन्हा एकदा विजय खेचून आणला आहे. प्रियांका गांधी यांची सभा होऊनही फारसा परिणाम झालेला नाही. कोल्हापूर दक्षिणची लढाई खासदार धनंजय महाडिक यांनी लाडक्या बहिणींवरून केलेल्या वक्तव्यावरून राज्य पातळीवरती गेली होती. त्यामुळे कोल्हापूर दक्षिणच्या हाय व्होल्टेज लढाईमध्ये कोण बाजी मारणार? याकडे फक्त जिल्ह्याचे नव्हे, तर राज्याचे लक्ष लागून राहिले होते.
त्यामुळे सतेज पाटील यांची सुद्धा प्रतिष्ठा या मतदारसंघांमध्ये पणाला लागली होती. मात्र उत्तर प्रदेशचे मुख्यमंत्री योगी आदित्यनाथ यांची झालेली सभा, लाडकी बहीण योजना, कोल्हापूर दक्षिणच्या निकालामध्ये महत्त्वपूर्ण ठरल्याचे दिसून आला आहे. कोल्हापूर जिल्ह्यामध्ये काँग्रेस हा मोठा पक्ष असताना सुद्धा मोठा पराभव स्वीकारावा लागला आहे. २०१९ च्या निवडणुकीमध्ये काँग्रेसने कोल्हापूर दक्षिण, कोल्हापूर उत्तर, करवीर, हातकणंगले विधानसभा मतदारसंघांमध्ये विजय खेचून आणला होता.
त्यामुळे त्या कामगिरीची पुनरावृत्ती सुद्धा काँग्रेसला करता आलेली नाही. कोल्हापूरचे राजकीय विद्यापीठ समजले जाणाऱ्या कागल विधानसभेला हसन मुश्रीफ यांनी राष्ट्रवादी काँग्रेस शरदचंद्र पवार पक्षाकडून तगडा विरोध होऊन सुद्धा विजय खेचून आणला आहे. हसन मुश्रीफ यांनी समरजितसिंह घाटगे यांचा ११ हजार ६०९ मतांनी पराभव करत पुन्हा एकदा विजय खेचून आणला आहे. मुश्रीफ सहाव्यांदा कागलच्या रणांगणामध्ये बाजीगर ठरले आहेत.
विजयी व पराभूत उमेदवार
१) कोल्हापूर दक्षिण अमल महाडिक (भाजप) विजयी, ऋतुराज पाटील (काँग्रेस) पराभूत,२) कोल्हापूर उत्तर राजेश क्षीरसागर (शिवसेना शिंदे गट) विजयी, राजेश लाटकर, (काँग्रेस पुरस्कृत) पराभूत.३) कागल हसन मुश्रीफ, (राष्ट्रवादी अजित पवार) विजयी, समरजितसिंह घाटगे (राष्ट्रवादी शरद पवार) पराभूत. ४) करवीर चंद्रदीप नरके (शिवसेना शिंदे गट)विजयी, राहूल पाटील, (काँग्रेस) पराभूत ५) इचलकरंजी- राहुल आवाडे (भाजप) विजयी,मदन कांरडे (राष्ट्रवादी शरद पवार गट) पराभूत. ६) चंदगड शिवाजी पाटील (अपक्ष) विजयी, राजेश नरसिंहराव पाटील (राष्ट्रवादी अजित पवार), नंदाताई बाभूळकर (राष्ट्रवादी शरद पवार गट) पराभूत. ७) राधानगरी प्रकाश आबिटकर, (शिवसेना शिंदे गट) विजयी, के. पी. पाटील (शिवसेना शिवसेना ठाकरे गट) पराभूत. ८) शिरोळ राजेंद्र पाटील, (अपक्ष) विजयी,गणपतराव पाटील (काँग्रेस) पराभूत. ९) हातकणंगले अशोकराव माने (जनसुराज्य शक्ती) विजयी, राजू आवळे, (काँग्रेस) पराभूत. १०) शाहूवाडी- विनय कोरे, (जनसुराज्य शक्ती ) विजयी, सत्यजित पाटील (शिवसेना ठाकरे पराभूत)
