जत तालुक्यात आरोग्य विभागाची 103 पदे रिक्त
जत,(प्रतिनिधी): जत तालुक्यात ग्रामीण रुग्णालय व आठ प्राथमिक आरोग्य केंद्रात 103 पदे रिक्त आहेत.तातडीने वैद्यकीय अधिकारी व इतर आरोग्य कर्मचारी या रिक्त जागा भराव्यात, अशी मागणी जतचे आमदार विक्रम सावंत यांनी मुख्यमंत्री उध्दव ठाकरे यांच्याकडे केली आहे.
![Rate Card](http://sankettimes.com/wp-content/uploads/2023/08/Sanket_SANKET_MAI_20230729_3_1_.jpeg)
सध्या देशभर कोरोना (कोव्हीड 19)या संसर्गजन्य आजाराची साथ मोठ्या प्रमाणात पसरली असून जत तालुक्यामध्ये 2 ग्रामीण रुग्णालय व 8 प्राथमिक आरोग्य केंद्र आहेत .सध्या याठिकाणी डॉक्टर व आरोग्यसेवक यांची पदे रिक्त असल्याने सेवा विस्कळीत झाली आहे.सध्या कोरोना व्हायरसने देशभरात व महाराष्ट्रात थैमान घातला आहे. त्यातच सांगली जिल्ह्यातील इस्लामपूर येथे कोरोनाचे रुग्ण आढळले आहेत. जत तालुक्यातील बहुतांशी उसतोड कामगार इस्लामपूर, कडेगाव, सांगली, वाळवा, कुंडल व अन्य कारखान्यास उसतोडीसाठी गेलेले आहेत. ते कोरोनाच्या भीतीने परत जत तालुक्यात आले असून त्यांची तपासणी करण्यासाठी व उपचार करण्यासाठी डॉक्टरांची व आरोग्य सेवकांची संख्या अगदी तुटपुंजी असून कोरोनाचा पुढील धोका टाळण्यासाठी जत तालुक्याला खास बाब म्हणून डॉक्टर व रुग्णसेवक तातडीने उपलब्ध करून देण्यात यावे.