सांगली : ऊसदराच्या मागणीवरून सांगली जिल्ह्यात शेतकरी आंदोलन तीव्र झाले आहे. आमदार अतुल भोसले यांच्या कार्यक्षेत्रातील कृष्णा सहकारी साखर कारखान्याने ऊसदर निश्चित न करताच गळीत हंगाम सुरू केल्याच्या निषेधार्थ स्वाभिमानी शेतकरी संघटनेच्या कार्यकर्त्यांनी आक्रमक भूमिका घेतली आहे. त्यामुळे परिसरात तणावाचे वातावरण निर्माण झाले असून आंदोलन चिघळण्याची शक्यता आहे.
कराड आणि सांगली जिल्ह्यांच्या कार्यक्षेत्रात असलेल्या वाळवा तालुक्यातील शिवनगर येथील कृष्णा सहकारी साखर कारखान्याकडे जाणारी ऊस वाहतूक कार्यकर्त्यांनी रोखली. तसेच उसाने भरलेल्या काही वाहनांची हवा सोडण्यात आल्याचे वृत्त आहे. ऊसदर जाहीर केल्याशिवाय गळीत हंगाम सुरू करू नये, अशी आंदोलकांची भूमिका आहे.
राजू शेट्टी यांच्या नेतृत्वाखालील स्वाभिमानी शेतकरी संघटनेच्या सहकाऱ्यांनी या आंदोलनात सहभाग घेतल्याने ऊसदराचा प्रश्न पुन्हा ऐरणीवर आला आहे. ऊस उत्पादनासाठी लागणारा वाढता खर्च, मजुरी, खतांचे दर आणि शेतीच्या इतर खर्चांच्या पार्श्वभूमीवर शेतकऱ्यांना योग्य दर मिळावा, अशी मागणी केली जात आहे.
दर निश्चितीबाबत कारखाना व्यवस्थापन आणि शेतकरी संघटना यांच्यात तोडगा न निघाल्यास आंदोलन अधिक तीव्र होण्याची शक्यता आहे. त्यामुळे आगामी काळात ऊस वाहतूक आणि गळीत हंगामावर परिणाम होणार का, याकडे शेतकरी व साखर उद्योगाचे लक्ष लागले आहे.
